МІНСК, 6 кра — Sputnik. Беларусы з дэпрэсіяй не вельмі актыўна звяртаюцца за медыцынскай дапамогай, распавяла ў чацвер журналістам начальнік галоўнага ўпраўлення арганізацыі медыцынскай дапамогі Міністэрства аховы здароўя Алена Богдан.
Сусветны дзень здароўя пройдзе 7 красавіка. Штогод СААЗ выбірае галоўную тэму гэтага дня, а ў 2017 годзе ўвагу медыкаў і людзей па ўсім свеце вырашылі сканцэнтраваць на дэпрэсіі.
"Аб людзях, якія пакутуюць дэпрэсіяй, трэба казаць. Адна з праблем у тым, што з хворымі людзьмі не размаўляюць, ніхто не прагаворвае аб іх праблемах. Акцыя накіравана не столькі на сістэму аховы здароўя, колькі на папуляцыю, насельніцтва — каб грамадзяне даведаліся пра дапамогу, якую могуць аказваць дзяржаўныя структуры, некамерцыйныя фонды", — пракаментавала Багдан.
Прадстаўнік Міністэрства аховы здароўя адзначыла, што "людзі з дэпрэсіяй не вельмі актыўна звяртаюцца за дапамогай, хоць неабходная сетка і створана".
Багдан прывяла прыклад: у кожнай паліклініцы пазначаны нумары тэлефонаў, па якіх грамадзяне могуць ананімна звяртацца за дапамогай. Па словах прадстаўніка ведамства, дэпрэсія — хвароба не толькі дарослых.
"Важна памятаць, што ёсць, дарэчы, і дзіцячая дэпрэсія. Яна можа быць абумоўлена халоднасцю бацькоў і адсутнасцю бацькоўскай любові. З дзецьмі трэба размаўляць з ранняга ўзросту. Дзіця павінна чуць гаворку родных людзей, а не сядзець у тэлефоне або ля тэлевізара", — распавяла медык.
Яна таксама дадала, што колькасць дэпрэсій у краіне не звязана з эканамічнай ці сацыяльнай сітуацыяй.
Паводле дадзеных СААЗ, штогод у свеце адбываецца каля 800 тысяч самагубстваў. Дэпрэсіяй па ўсім свеце хварэюць больш за 300 мільёнаў чалавек. Па краінах колькасць хворых вагаецца ад 3,8 да 6,3% ад агульнай папуляцыі. У Беларусі дэпрэсія ёсць у 5,6% насельніцтва, што вышэй сярэдняга паказчыка па еўрапейскім рэгіёне.
