МІНСК, 17 кра — Sputnik. Папулярны мінскі відэаблогер Улад Бумага апублікаваў уласную версію віруснага роліка гурта "Грибы" на песню "Тает лед".
Ролік на песню "Тает лед" стаў вірусным і сабраў толькі на YouТube парадку 50 мільёнаў праглядаў. Многія вядомыя персоны і арганізацыі зрабілі свае пародыі на ролік — у тым ліку тэлевядучы Іван Ургант і ваенны факультэт БДУ.
Далучыўся да трэнду і блогер Улад Бумага, вядомы па сваім YouТube-канале А4, на які падпісаны амаль паўтара мільёна чалавек. Сваю версію "Тает лед" 20-гадовы блогер прысвяціў службе ў войску. За некалькі дзён відэа сабрала больш за два мільёны праглядаў.
Абмяркоўваюць у сацыяльных сетках і сваю версію "Тает лед", прадстаўленую ў суботу рэчыцкімі ратавальнікамі. Маладыя людзі праспявалі пра сваю працу і выратаванні людзей з надзвычайных сітуацый. Ролік МНС за два дні паглядзелі каля 40 тысяч разоў.
Гурт "Грибы" ўтварыўся ў Кіеве ў 2016 годзе. У "партфоліё" калектыву некалькі папулярных сярод моладзі кампазіцый, аднак дзякуючы "Тает лед" яны сталі па-сапраўднаму вядомыя на ўсёй постсавецкай прасторы.
