МІНСК, 2 мая — Sputnik. У Беларусі ў перыяд з 1 мая па 30 верасня 2017 года пенсіянеры змогуць ездзіць у цягніках рэгіянальных ліній па ільготным тарыфе, паведамілі Sputnik у адміністрацыі Беларускай чыгункі.
У Беларусі ў дачны сезон асобы пенсіённага ўзросту традыцыйна атрымліваюць зніжкі на праезд у прыгарадных цягніках.
"У перыяд з 1 мая па 30 верасня на паездкі ў цягніках рэгіянальных ліній эканом-класа будзе дзейнічаць ільготны тарыф на квіткі для пенсіянераў. Для куплі квіткоў са зніжкай грамадзянін будзе абавязаны прад'явіць у касе арыгінал пенсіённага пасведчання", — паведамілі ў БЧ.
Там удакладнілі, што скарыстацца зніжкай змогуць мужчыны ва ўзросце ад 60 з паловай гадоў, жанчыны ва ўзросце старэйшыя за 55 з паловай гадоў.
У БЧ таксама нагадалі, што зніжкі не распаўсюджваюцца на праезд у электрычках рэгіянальных ліній бізнес-класа, гэта значыць з нумараванымі месцамі.
Праезд у электрацягніках гарадскіх ліній таксама будзе ажыццяўляцца за поўны кошт для ўсіх катэгорый грамадзян.
