МІНСК, 10 мая — Sputnik. Археолагі знайшлі ў цэнтры Масквы скарб часоў Івана Грознага, паведамляецца на афіцыйным партале мэра горада.
"Дзесяць манет былі схаваныя ўнутры полай касцяной шахматнай фігуры слана. Знаходку датуюць сярэдзінай XVI стагоддзя", — гаворыцца ў паведамленні.
Як распавёў парталу кіраўнік дэпартамента культурнай спадчыны Аляксей Емяльянаў, сума схаваных у фігуру срэбных манет ручной чаканкі — пяць капеек. Адну з манет зрабілі на Цвярскім манетным двары, а астатнія дзевяць — на Маскоўскім.
Касцяная фігура слана полая ўнутры, яна складаецца з трох частак, якія злучаюцца адно з адным з дапамогай разьбы. Мяркуецца, што сапраўды такімі ж былі і іншыя фігуры шахматнага набору, а агульная сума схаваных грошай магла дасягаць 160 капеек.
Фігуру і манеты ачысцілі і пакрылі ахоўнымі складамі. Цяпер прымаецца рашэнне аб перадачы знаходкі ў музей.
Скарб знайшлі ў будаўнічай траншэі пры замене газавых камунікацый у рамках добраўпарадкавання па праграме "Мая вуліца". Археолагі вядуць маніторынг усіх рамонтных прац, якія могуць закрануць культурныя слаі.
