МІНСК, 20 мая — Sputnik. Міжнародная выстава ўзбраення і ваеннай тэхнікі MILEX пачала працу ў беларускай сталіцы, перадае карэспандэнт Sputnik у суботу з пляцоўкі на тэрыторыі мінскага аэрапорта Мінск-1.
Дадзеная выстава праводзіцца ў Мінску з 2001 года, кожныя два гады. Арганізатары заўсёды праводзяць яе ў маі. Папярэдні раз выстава праводзілася 3 гады таму.
Як паведамілі прадстаўнікі Дзяржаўнага ваенна-прамысловага камітэта Беларусі, мерапрыемства наведаюць больш за 50 афіцыйных дэлегацый з 30 краін свету.
"Гэта і нашы традыцыйныя дзяржавы-партнёры, і патэнцыйныя дзяржавы-заказчыкі беларускай вайсковай тэхнікі і ўзбраення", — заявілі Sputnik прадстаўнікі ў Дзяржкамваенпрама.
Экспазіцыя выставы займае амаль 7000 квадратных метраў на закрытай пляцоўцы і 12 000 квадратных метраў на адкрытай плошчы, яна перавысіла паказчыкі 2014 года — калі папярэдні раз праводзіўся MILEX — амаль у 1,4 разы, адзначылі ў ДВПК.
Там таксама падкрэслілі, на выставу, якая пройдзе 2 дні, прыбылі больш за 140 удзельнікаў з Беларусі, Германіі, Кітая, Казахстана, Расіі, Славакіі і Украіны, упершыню ў MILEX прымаюць удзел кампаніі з Германіі і Славакіі.
Па словах суразмоўцаў агенцтва, Расія па традыцыі з'яўляецца адным з самых актыўных удзельнікаў гэтай выставы. Паводле звестак арганізатараў, у гэтым годзе 11 прадпрыемстваў расійскай "абаронкі" прадставіць больш за 350 узораў узбраення і ваеннай тэхнікі.
Другі раз у MILEX прымуць удзел вытворцы з Кітая — гэта Кітайская аэракасмічная міжнародная гандлёвая кампанія "Вялікі паход".
У Дзяржкамваенпраме адзначылі, што амаль 80 беларускіх прадпрыемстваў і ўстаноў адукацыі экспануюць сваю прадукцыю.
Распавядаючы пра тое, якія айчынныя ўзоры ўзбраення будуць прадстаўлены на MILEX, у ДВПК адзначылі, што гэта будуць сістэмы агнявога паражэння, баявыя авіяцыйныя комплексы ваеннага і грамадзянскага прызначэння, сістэмы комплекснага супрацьдзеяння высокадакладнай зброі — камплект РСЗА "Паланэз", бранираваны транспартны сродак "Кайман", партатыўны перадатчык перашкод малопамерным БПЛА "Навальніца-Р", а таксама больш складаная і ўнікальная станцыя "Навальніца".
На выставе таксама прадстаўлена экспазіцыя ваеннай рэтра-тэхнікі.
Выставу "MILEX-2017" асвятляюць больш за 100 журналістаў. У Дзяржкамваенпраме заявілі, што "MILEX-2017" будзе садзейнічаць умацаванню міжнароднага аўтарытэту Беларусі.
