МІНСК, 8 чэр — Sputnik. Былы прэзідэнт ЗША Барак Абама на працягу васьмі гадоў апранаў на афіцыйныя мерапрыемствы адзін і той жа смокінг, паведаміла яго жонка Мішэль, піша выданне Daily Mail.
Былая першая лэдзі ЗША выступіла на Сусветнай канферэнцыі для распрацоўшчыкаў на платформах Apple (Worldwide Developers Conference, WWDC) у горадзе Сан-Хасэ (штат Каліфорнія). Пры гэтым Мішэль Абама адказала на шэраг пытанняў, у тым ліку адносна адзення. Яна заявіла, што СМІ пастаянна абмяркоўвалі яе ўборы на афіцыйных прыёмах, але ніхто не звярнуў увагі на адзін і той жа касцюм яе мужа.
"Фатаграфуюць, які я нашу абутак, бранзалеты, калье. Але ніхто не каментуе, што на працягу васьмі гадоў ён (Барак Абама — Sputnik) насіў адзін і той жа смокінг, адны і тыя ж туфлі", — сказала былая першая лэдзі.
Мішэль Абама таксама заявіла, што яе муж нават ганарыўся гэтым фактам.
Барак Абама пакінуў Белы дом у студзені мінулага года. Яго на вышэйшым дзяржаўным пасту ЗША змяніў мільярдэр Дональд Трамп, які атрымаў перамогу на прэзідэнцкіх выбарах 2016 года над Хілары Клінтан.
