МІНСК, 8 чэр — Sputnik. Беларусь і Расія могуць падпісаць міжурадавае пагадненне аб узаемным прызнанні візаў, выдадзеных грамадзянам трэціх краін, да канца гэтага года, заявіў пасол РФ у рэспубліцы Аляксандр Сурыкаў у эксклюзіўным інтэрв'ю Sputnik.
Пасля ўвядзення ў Беларусі з лютага 2017 года бязвізавага рэжыму расійскі бок заявіў пра неабходнасць мінімізаваць рызыку ўезду ў краіну праз Беларусь грамадзян з "чорнага спісу". У РФ спачатку стварылі памежныя зоны на беларуска-расійскай мяжы, а затым перавялі беларускія рэйсы ў расійскіх аэрапортах у мiжнародныя зоны, што выклікала дадатковыя нязручнасці для грамадзян Беларусі і Расіі.
"У гэтай сітуацыі мы працуем над дакументам аб адзінай візавай прасторы, аб узаемным прызнанні візаў беларускіх і расійскіх, і праект міждзяржаўнай дамовы ўжо ёсць, беларускі бок яго паглядзеў, унёс свае заўвагі і нам накіраваў. Два МЗС над гэтым працуюць. Я думаю, яна рэалізуецца ў выглядзе міжурадавай дамовы аб адзінай візавай прасторы да канца гэтага года, можа быць, крыху пазней", — сказаў дыпламат.
Паводле яго слоў, перавод беларускіх рэйсаў у міжнародныя тэрміналы расійскіх аэрапортаў прадыктаваны імкненнем РФ абараніць сябе ад міжнароднага тэрарызму. У той жа час пасол прызнаў, што тут існуюць некаторыя шурпатасці, паколькі не ўсе расійскія аэрапорты маюць міжнародныя тэрміналы.
"Мы ўезд зробім зусім свабодным і празрыстым для расіянаў і беларусаў. Але ў Маскве ёсць міжнародныя калідоры, а ў нейкім горадзе для чартэрных рэйсаў трэба асобна з памежнікамі дамаўляцца. Прыладзіцца ўсё і паўстане на свае месцы, важна, каб хутчэй", — дадаў ён.
