МІНСК, 15 чэр — Sputnik. У бліжэйшыя суткі надвор'е прыкметна палепшыцца, колькасць дажджоў паменшыцца, а тэмпература стане адпавядаць летняй норме.
"У пятніцу надвор'е будзе вызначаць вобласць павышанага атмасфернага ціску, на тэрыторыі краіны пераважна без ападкаў, толькі па захадзе, днём у асобных раёнах магчымыя кароткачасовыя дажджы, навальніцы", — паведаміў начальнік службы гідраметэапрагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Дзмітрый Рабаў.
Тэмпература ноччу +6..+12°С, у асобных раёнах +3..+5°С, днём +20..+26°С. У суботу на тэрыторыі рэспублікі чакаецца яснае надвор'е, па паўднёва-заходняй палове краіны магчымыя кароткачасовыя дажджы, у асобных раёнах з навальніцамі.
Тэмпература ноччу +8..+15°С, у паўночна-ўсходніх раёнах +6..+7°С; днём +16..+23°С, па паўночным усходзе да +25°С. У нядзелю надвор'е ў Беларусі будзе фарміравацца пад уплывам павышанага атмасфернага ціску.
Ападкаў не чакаецца, невялікія кароткачасовыя дажджы магчымыя толькі ноччу па паўднёвым захадзе рэспублікі. Тэмпература ноччу +6..+13°С, днём +21..+27°С.
Пачатак наступнага тыдня, паводле слоў сіноптыка, таксама абяцае быць цёплым, без істотных ападкаў, толькі па поўначы краіны магчымы кароткачасовыя дажджы, навальніцы. Тэмпература ноччу +9..+16°С, днём +22..+28°С.
