МІНСК, 16 чэр — Sputnik. Удава Джона Ленана Ёка Она афіцыйна прызнана суаўтарам культавай кампазіцыі свайго мужа Imagine, паведаміла выданне Billboard.
Нацыянальная асацыяцыя музычных выдаўцоў ЗША абвясціла аб прызнанні Оны суаўтарам больш чым праз 40 гадоў пасля выхаду песні. Арганізатары цырымоніі прайгралі запіс аднаго з інтэрв'ю Джона Ленана, дзе ён прызнае ўнёсак жонкі ў стварэнне кампазіцыі.
"Насамрэч яна павінна лічыцца песняй Ленана-Оны таму, што многае ў ёй — лірыка і канцэпцыя — ад Ёкі. Але ў тыя дні я быў трохі больш эгаістычным, трохі больш мачо і неяк апусціў згадку пра яе ўнёсак", — сказаў у інтэрв'ю BBC Ленан.
84-гадовая Она асабіста прысутнічала на цырымоніі са сваім сынам Шонам Ленанам.
Вядомая і папулярная ва ўсім свеце кампазіцыя Imagine з аднайменнага альбома 1971 года займала найвышэйшыя радкі ў хіт-парадах Вялікабрытаніі і ЗША. Песню да гэтага часу любяць і слухаюць тысячы меламанаў.
