МІНСК, 16 чэр — Sputnik. План будаўніцтва першай лініі метро з васьмі станцый быў прыняты Саветам міністраў СССР 4 лютага 1977 года неўзабаве пасля нараджэння мільённага мінчука, а 16 чэрвеня 1977 года была закладзена першая паля ў падмурак будучай станцыі "Парк Чалюскінцаў".
Першая лінія мінскай падземкі цягнулася ад станцыі "Валгаградская" (зараз "Маскоўская") да станцыі "Інстытут культуры" і будавалася з 1977 па 1984 год. Урачыстае адкрыццё метро адбылося 30 чэрвеня 1984 года, напярэдадні 40-й гадавіны вызвалення Мінска ад нямецка-фашысцкіх захопнікаў.
Пасля гэтага лінія яшчэ чатыры разы дабудоўвалася, і сёння яе працягласць складае 19,1 км — ад станцыі метро "Уручча" да станцыі "Малінаўка" — і ўключае 15 станцый. Першая лінія метро праходзіць пад усім праспектам Незалежнасці і перасякае сталіцу з паўночнага ўсходу на паўднёвы захад.
Другая лінія падземкі адкрылася 31 снежня 1990 года і складалася з пяці станцый. Пасля чатырох працягненняў яна набыла сучасны выгляд — працягласць 18,1 кіламетра з 14 станцый.
Адкрыццё трэццяй лініі метро запланавана на 2020 год. Яна павінна звязаць мікрараён Зялёны Луг з Курасоўшчынай. Плануецца, што яе шлях будзе складацца з 14 станцый працягам у 17,2 кіламетра.
