МІНСК, 23 чэр — Sputnik. На майстар-клас і дэгустацыю марозіва па арыгінальных беларускіх рэцэптах чатырох эпох — ад ВКЛ да БССР — у чацвер увечары прыйшлі больш за сотню гасцей.
Аўтары праекта анансавалі напярэдадні вольны ўваход у музей і магчымасць паспрабаваць марозіва, якое ў свой час елі князі ВКЛ і мясцовая шляхта ў XIX стагоддзі. Яшчэ аб двух гістарычных прысмаках — марозіве XVII стагоддзя на тварагу і савецкім марозіве па ДАСТам абяцалі распавесці.
Убачыць, як гатуюць марозіва часоў ВКЛ, якое, кажуць, у Беларусь прывезла італьянка Бона Сфорца, змаглі далёка не ўсе. У чаканні дэгустацыі найбольш устойлівыя госці разглядалі экспазіцыю музея. Тыя, у каго не было сіл чакаць, куплялі фабрычнае марозіва. У пэўны момант за ім таксама ўтварылася чарга. Але ў голас ніхто не наракаў. На просьбу Sputnik падзяліцца ўражаннямі, наведвальнікі казалі, што ўсё падабаецца.
"Для дзяцей гэта карысна і развівае іх, пашырае кругагляд. А з пункту гледжання таго, што людзей шмат — гэта ж зразумела. Мерапрыемства бясплатнае, даступнае, для ўсіх жадаючых. Так што тут скардзіцца няма чаго", — прызналася Тамара, мама Ягора і Сафіі.
Рэпартаж з майстар-класа па арыгінальных беларускіх рэцэптах чатырох эпох — ад ВКЛ да БССР — будзе апублікаваны на Sputnik.by у бліжэйшы час. Сачыце за абнаўленнямі партала.
