МІНСК, 7 ліп — Sputnik. Халаднаватае надвор'е захаваецца на Беларусі ў пятніцу 7 ліпеня, але ападкаў ужо будзе менш, паведамілі Sputnik у Гідрамеце.
Паводле інфармацыі сіноптыкаў, летняе цяпло прыйдзе ў рэспубліку толькі ў другой дэкадзе ліпеня, да гэтага ў краіне будзе захоўвацца свежае надвор'е.
"Чакаецца пераменная воблачнасць, будзе пераважна без ападкаў, толькі па паўночным усходзе краіны ў асобных раёнах пройдуць невялікія кароткачасовыя дажджы", — сказалі ў Гідрамеце.
Там таксама паведамілі, што максімальная тэмпература паветра днём складзе ад +16 да +21°С, па паўднёвым захадзе Беларусі — да +23°С. У Мінску, па словах суразмоўцаў Sputnik, без дажджу, а днём паветра прагрэецца да +20°С.
