МІНСК, 10 ліп — Sputnik. Сертыфікаты аб праходжанні цэнтралізаванага тэставання (ЦТ) пачынаюць выдаваць у Беларусі ў панядзелак, паведамілі Sputnik у Мінадукацыі рэспублікі.
Абітурыенты здавалі ЦТ — неабходны этап уступнай кампаніі ў ВНУ Беларусі — на працягу чэрвеня і першых дзён ліпеня. Усяго на выпрабаванні ў бягучым годзе зарэгістраваліся больш за 90 тысяч чалавек.
Сертыфікаты аб праходжанні ЦТ пачалі выдаваць 10 ліпеня. Забраць дакумент можна ў тым пункце, дзе абітурыент праходзіў тэставанне. Атрымаць сертыфікат абітурыент павінен сам, у выключным выпадку гэта можа зрабіць яго законны прадстаўнік.
Сертыфікаты аб праходжанні ЦТ у 2017 годзе будуць сапраўдныя на працягу двух гадоў — да канца 2018 года. Такім чынам, абітурыенты змогуць па іх паступаць у навучальныя ўстановы і ў наступным годзе.
Падача дакументаў у ВНУ пачнецца ўжо ў сераду 12 ліпеня.
