МІНСК, 23 ліп — Sputnik. Паменшаная копія візітнай карткі Парыжа з'явілася ў Мінску напярэдадні трэцяга канцэрта фестывалю "Класіка каля Ратушы".
Беларуская Эйфелева вежа ўжо стала папулярным аб'ектам сярод адпачываючых увечары каля Ратушы. Зрабіць эфектнае фота і акунуцца ў атмасферу рамантычнага Парыжа сёння можна, не выязджаючы за межы не толькі рэспублікі, але нават горада.
Суботні канцэрт класічнай музыкі быў прысвечаны 25-годдзю з дня ўстанаўлення французска-беларускіх дыпламатычных адносін.
Эйфелева вежа з'явілася ў сталіцы толькі ў суботу ўвечары, але самыя шустрыя карыстальнікі сацсетак ужо паспелі падзяліцца здымкамі з ёй.
Серыя канцэртаў "Класіка каля Ратушы" праходзіць з 8 ліпеня па 26 жніўня ўжо ў трэці раз. Уваход на суботнія канцэрты вольны.
