МІНСК, 1 жні — Sputnik. Сіноптыкі зрабілі папярэджанне аб тым, што на тыдні па ўсёй тэрыторыі рэспублікі чакаюцца складаныя ўмовы надвор'я, паведамілі ў Гідрамеце. Надвор'е ў Беларусі ў бліжэйшыя дні будуць вызначаць актыўныя атмасферныя франты і вельмі цёплая паветраная маса.
"Выпісана папярэджанне аб неспрыяльных метэаралагічных з'явах, абвешчаны аранжавы ўзровень небяспекі", — паведаміў Sputnik у аўторак начальнік службы гідраметэапрагнозаў Рэспубліканскага цэнтра па гідраметэаралогіі, кантролі радыёактыўнага забруджвання і маніторынгу навакольнага асяроддзя Дзмітрый Рабаў.
З яго слоў, 2 жніўня ноччу і раніцай па поўначы, днём на большай частцы тэрыторыі рэспублікі чакаюцца навальніцы, пры навальніцах месцамі шквалістае ўзмацненне ветру парывамі да 15-20 метраў за секунду, днём у асобных раёнах да 24 метраў за секунду.
"Днём у асобных раёнах град, моцныя ліўні, па большай частцы тэрыторыі рэспублікі паветра прагрэецца да +30..+34°С, у асобных раёнах па поўдні да +35..+36°С", — паведаміў сіноптык.
У Мінску ў сераду ноччу будзе без ападкаў. "А ў другой палове дня чакаецца кароткачасовы дождж, навальніца, месцамі па горадзе град, моцныя ліўні, пры навальніцы шквалістае ўзмацненне ветру да 15-20 м/с, у асобных раёнах горада парывы да 24 метраў за секунду", — сказаў Рабаў.
З яго слоў, тэмпература ўначы ў гэтыя дні будзе +19..+21°С, днём +30..+32°С. У чацвер спякота пачне крыху спадаць, удакладнілі ў Гідрамеце.
"3 жніўня ў асобных раёнах краіны пройдуць кароткачасовыя дажджы, навальніцы. Тэмпература ноччу +13..+19°С, днём +22..+28°С, па паўднёвым усходзе +29..+31°С", — сказаў суразмоўца Sputnik.
У пятніцу атмасферныя франты з Заходняй Еўропы зноў прынясуць на Беларусь кароткачасовыя дажджы, навальніцы, тэмпература ноччу чакаецца +13..+20°С, днём +22..+29°С, па поўдні +30..+32°С, паведаміў Рабаў.
