Адным з самых пацярпелых рэгіёнаў краіны падчас учорашняга ўрагану стаў Вілейскі раён Мінскай вобласці. Відавочцы з вёскі Крывое сяло заснялі магутны вецер і лівень. Ураган зрываў вялікія галіны з дрэў і выносіў іх на дзясяткі метраў. Жыхары дома па суседстве здымалі ўсё на відэа, замкнуўшыся ў доме — пабаяліся выходзіць на вуліцу.
Раней паведамлялася, што бура ў Вілейцы пашкодзіла дахі будынкаў, выкарчавала некалькі дрэў, былі павалены платы і выбіта шкло ў хатах. Некаторыя будынкі і зусім засталіся цалкам без даху. Ветрам паваліла дрэва на VW Transporter, у выніку загінула 11-гадовая дзяўчынка.
Паводле інфармацыі сіноптыкаў, неспрыяльнае надвор'е захаваецца і 3 жніўня.
