МІНСК, 3 жні — Sputnik. Савет міністраў Беларусі пастановай №577 ад 1 жніўня распарадзіўся дадаткова вылучыць на выплату пенсій і дапамог за 500 мільёнаў рублёў, паведамілі Sputnik у прэс-службе беларускага ўрада.
Дакументам даручаецца Мінфіну ў бягучым годзе звыш сродкаў, прадугледжаных у бюджэце Фонду сацыяльнай абароны насельніцтва (ФСАН), вылучыць у выглядзе міжбюджэтнага трансфэрту рэшткі сродкаў рэспубліканскага бюджэту, якія ўтварыліся на 1 студзеня, у суме 500 мільёнаў рублёў.
"Гэтыя сродкі пойдуць на фінансаванне расходаў на выплату пенсій і дапамог, у тым ліку з улікам забеспячэння суадносін сярэдняга памеру пенсіі па ўзросту і сярэдняй заработнай платы работнікаў у рэспубліцы не ніжэй устаноўленага парогавага значэння паказчыка нацыянальнай бяспецы ў сацыяльнай сферы", — растлумачылі ў прэс-службе.
Дакумент уступае ў сілу пасля афіцыйнага апублікавання.
Раней у матэрыялах Мінфіна адзначалася, што бюджэт ФСАН з-за яго запазычанасці плацельшчыкаў мае дэфіцыт у памеры каля 1,5 мільярдаў рублёў.
Між тым у Беларусі з 1 жніўня павялічыліся мінімальныя працоўныя і сацыяльныя пенсіі, а таксама надбаўкі да іх і аднаразовыя дапамогі пры нараджэнні дзяцей і дэкрэтныя выплаты.
У цяперашні час у Беларусі сярэдняя пенсія складае 298 рублёў, што адпавядае 36,4% сярэдняй намінальнай зарплаты. У той жа час макрапрагнозам да 2020 года вызначана, што сярэдняя пенсія па ўзросту павінна складаць не менш за 40% ад сярэдняй намінальнай зарплаты па краіне.
