МІНСК, 10 жні — Sputnik. Дзяржаўны літаратурна-мемарыяльны музей Якуба Коласа 14 жніўня адкрывае выставу мастацкіх партрэтаў Якуба Коласа "Спяшайцеся з паэтам стрэцца…", паведамілі Sputnik арганізатары.
Мерапрыемства адбудзецца ў рамках музейнага выставачнага праекту "Словы і рэчы: невядомыя калекцыі", прымеркаваны да 135-годдзя з дня нараджэння народнага паэта Беларусі Якуба Коласа.
"Увазе наведвальнікаў будуць прадстаўлены партрэты Якуба Коласа, створаныя знакамітымі беларускімі мастакамі В. Волкавым, Г. Паплаўскім, У. Сулкоўскім, С. Федарэнкам", — распавялі ў музеі.
Асаблівую каштоўнасць прадстаўляюць прыжыццёвыя партрэты песняра. У чэрвені 1940 года падчас знаходжання Якуба Коласа на Дэкадзе беларускага мастацтва ў Маскве маладым беларускім мастаком З. Паўлоўскім быў створаны партрэт паэта за працай. А ў 1942 годзе падчас святкавання 60-годдзя Якуба Коласа рускім мастаком-графікам Т. Жырмунскай у Ташкенце быў зроблены яшчэ адзін унікальны партрэт.
Як паведамілі ў музеі, "упершыню будзе экспанавацца раней невядомы графічны партрэт Якуба Коласа, які размешчаны на вокладцы перыядычнага выдання "Белорусский иллюстрированный календарь" за 1944 г., якое выйшла з друку ў Буэнас-Айрэсе".
На выстаўцы прадстаўлены фотаздымкі, якія раскрываюць перад намі творчы працэс стварэння бюста пісьменніка З. Азгурам у сваёй майстэрні. Таксама прадстаўлены бюсты Якуба Коласа, якія зроблены беларускім скульптарам У. Летуном.
