МІНСК, 11 вер — Sputnik. Прэзідэнт Беларусі Аляксандр Лукашэнка ў панядзелак накіраваўся з афіцыйным візітам у Індыю, паведамілі Sputnik у прэс-службе кіраўніка беларускай дзяржавы.
Там адзначылі, што самалёт беларускага прэзідэнта вылецеў з Нацыянальнага аэрапорта Мінск і ўзяў курс на Нью-Дэлі.
Як паведамілі ў прэс-службе, у аўторак Лукашэнка правядзе перамовы і шэраг афіцыйных сустрэч з кіраўніцтвам Індыі, у тым ліку з прэзідэнтам Рамом Натхам Кавіндам і прэм'ер-міністрам Нарэндра Модзі.
"Падчас перамоваў будзе абмяркоўвацца развіццё беларуска-індыйскага супрацоўніцтва, галоўным чынам у гандлёва-эканамічнай, палітычнай, навукова-тэхнічнай і гуманітарнай сферах, турызме. Плануецца абмеркаваць і ўзаемадзеянне Беларусі і Індыі ў фармаце еўразійскай інтэграцыі, новыя магчымасці для інвестыцыйнага супрацоўніцтва", — адзначылі ў прэс-службе.
Там дадалі, што ўдзельнікі перамоваў абмяняюцца меркаваннямі па актуальных пытаннях міжнароднага парадку дня.
Як раней паведамляў Sputnik, папярэдняя высокая сустрэча паміж Беларуссю і Індыяй адбылася ў 2015 годзе — тады прэзідэнт краіны Пранаба Мукерджы наведаў Мінск, у якім праходзіў бізнес-форум дзвюх дзяржаў.
Апошні візіт Аляксандра Лукашэнкі ў Індыю адбыўся ў 2007 годзе. Індыя з'яўляецца пакупніком беларускіх калійных угнаенняў. Акрамя таго, індыйскія кампаніі зацікаўлены ў прыходзе на фармацэўтычны рынак краіны і ў сферу IT.
