МІНСК, 11 вер — Sputnik. Міністэрства аховы здароўя Беларусі абяцае ахапіць вакцынацыяй ад грыпу больш за 40% жыхароў краіны, паведамілі ў панядзелак у прэс-службе ведамства.
Вакцынацыя ад грыпу звычайна стартуе восенню. Як паведамілі ў Міністэрстве аховы здароўя, цяпер ужо завершаны падрыхтоўчы этап — установы аховы здароўя гатовыя да вакцынацыі.
Як адзначылі ў ведамстве, у 2017 годзе ў Беларусі кампанія вакцынацыі супраць грыпу зноў пройдзе з магчымасцю выкарыстання як вакцын для бясплатнай імунізацыі "Грыпол плюс" (Расія), так і вакцын, даступных за сродкі бюджэтаў прадпрыемстваў, арганізацый і асабістых сродкаў грамадзян — расійскай, французскай і іншых вытворчасцяў.
У цэлым жа кампанія па вакцынацыі насельніцтва ад грыпу павінна завяршыцца да 1 снежня — да пачатку эпідэмічнага ўздыму захворвання.
Вакцыны ўжо паступаюць ва ўстановы аховы здароўя. Ведамства абяцае зрабіць прышчэпкі больш чым 40% беларусаў — гэта значыць больш чым 3,8 мільёна жыхароў краіны.
Паказчыкі вакцынацыі ў Беларусі высокія кожны год. Медыкі ўпэўненыя: калі не правесці ўсе неабходныя вакцынацыі як мінімум сярод траціны насельніцтва, можа адбыцца эпідэмія грыпу. У апошнія гады падобных "выбліскаў" захворвання не было.
