МІНСК, 12 вер — Sputnik. Буйны штраф пагражае жыхару Воранаўскага раёна за здымку свайго прысядзібнага ўчастка з дрона ў памежнай зоне, паведамілі Sputnik у аўторак у Дзяржаўным памежным камітэце Беларусі.
Узлёт і пасадку квадракоптэра 11 верасня лідскія памежнікі заўважылі ў раёне вёскі Таврэлі, якая знаходзіцца ў памежнай зоне. Пасля было ўстаноўлена, што запускаў робат мясцовы жыхар.
"Малады чалавек растлумачыў, што ён здымаў з вышыні свой прысядзібны ўчастак", — сказалі ў ДПК.
У камітэце растлумачылі, што для выкарыстання ў памежнай зоне лятальных апаратаў масай больш кілаграма трэба паведаміць памежнікам, а ў памежнай паласе іх запускаць наогул забаронена.
Паводле інфармацыі ДПК, паколькі 33-гадовы мужчына раней ужо прыцягваўся да адказнасці за парушэнне памежнага рэжыму, яму цяпер пагражае штраф у памеры да 2300 рублёў (больш за тысячу долараў ЗША).
