МІНСК, 14 вер — Sputnik. Федэральным установам ЗША забаранілі выкарыстоўваць любое праграмнае забеспячэнне кампаніі "Лабараторыя Касперскага", паведамілі ў чацвер амерыканскія выданні.
"Лабараторыя Касперскага" выпусціла і суправаджае адзін з самых вядомых антывірусаў. Таксама кампанія займаецца распрацоўкай іншых праграм, а таксама інвестыцыямі ў стартапы. Як адзначае Washington Post, "Касперскі" быў усталяваны на кампутарах шасці федэральных устаноў ЗША, пры гэтым не выключаецца, што з расійскім антывірусам працавалі і ў іншых ведамствах.
Міністэрства ўнутранай бяспекі ЗША даручыла ўсім федэральным установам на працягу трох месяцаў спыніць выкарыстанне праграм вытворчасці "Касперскага". Пракаментавала гэта ўжо і афіцыйны прадстаўнік МЗС РФ Марыя Захарава.
"Вось і ўся добрасумленная канкурэнцыя ў трох радках", — напісала прадстаўнік знешнепалітычнага ведамства ў сваім акаўнце Facebook.
У сваю чаргу, у "Лабараторыі Касперскага" ужо таксама падкрэслілі, што не працуюць ні на які ўрад і не займаюцца кібершпіянажам. Абвінавачванні ўладаў ЗША ў адрас фірмы, упэўнены ў "Касперскім", звязаныя з ілжывымі і некарэктнымі дадзенымі.
Як адзначае Guardian, 400 мільёнаў карыстальнікаў па ўсім свеце выкарыстоўваюць прадукты кампаніі, 85% яе даходу прыпадае на замежных пакупнікоў. Як лічыць кіраўнік кампаніі Immunity Inc. Дэйв Айтэл, ад рашэння ўладаў ЗША можа пацярпець і бізнес расійскай кампаніі, не звязаны з урадавымі ўстановамі ЗША.
