МІНСК, 25 вер — Sputnik. Гродненскі заапарк даў прытулак саве, якую выратавалі супрацоўнікі Ленінскага аддзела аховы, паведамляе сайт заапарка.
"Калі праязджалі па адной з вуліц раёна, увагу прыцягнула вялікая колькасць варон, якія на кагосьці нападалі. Спыніўшыся, яны ўбачылі, што зграя варон дзяўбе "маленькага савёнка". Далейшага развіцця падзей міліцыянеры чакаць не сталі. Яны маментальна прынялі рашэнне даць птушцы шанец на жыццё і адвезлі яе ў заапарк", — гаворыцца ў паведамленні на сайце.
Пасля агляду ветэрынарнымі дактарамі было ўстаноўлена, што ў птушкі пашкоджана крыло; яна застанецца жыць у заапарку. Супрацоўнікі назвалі птушку Нафаня.
Цікава, што адбыўся гэты выпадак напярэдадні святкавання 65-й гадавіны ўтварэння службы аховы, сімвалам якой з'яўляецца сава.
