МІНСК, 27 вер — Sputnik. Форум тэатральнага мастацтва "ТэАрт" стартуе ў Мінску ў сераду і працягнецца па 16 кастрычніка, паведамілі Sputnik арганізатары мерапрыемства.
"Тэарт" — адзін з самых прэстыжных тэатральных фестываляў на постсавецкай прасторы. У 2017-м пройдзе форум ужо ў сёмы раз, а на сцэнах мінскіх тэатраў пакажуць лепшыя спектаклі дзясятка краін.
Адкрываецца "ТэАрт" 27 верасня пастаноўкай "Жаніцьбы" паводле твора Мікалая Гогаля. Спектакль адкрыцця ў Мінск прывезлі латвійскія тэатралы з Ліепайскага тэатра.
Працягнуцца паказы спектакляў у межах форуму аж да 16 кастрычніка. Спецыяльна для знаёмства з самымі гучнымі пастаноўкамі Беларусі, Расіі, Латвіі, Францыі, Славеніі, Італіі і іншых краін у беларускую сталіцу прыедуць прыхільнікі тэатра не толькі з розных гарадоў рэспублікі, але і сумежных дзяржаў.
Большасць квіткоў на пастаноўкі ў рамках "ТэАрта" ўжо раскуплены — у тым ліку і на якія атрымалі прэміі "Залатая маска" спектаклі "Макс Блэк, або 62 спосабы падперці галаву рукой" і "Іваноў".
У межах форуму "ТэАрт" гледачы знаёмяцца не толькі з класічным тэатральным мастацтвам, але і авангардным: эксперыментальнымі пастаноўкамі і арыгінальнай сцэнаграфіяй.
Арганізоўвае мерапрыемства кампанія "Арт Карпарэйшн", якая таксама займаецца прэстыжным кінафестывалем "Лістапад".
