МІНСК, 19 кас — Sputnik. У Мінску, нягледзячы на пацяпленне на бягучым тыдні, не плануецца адключаць ацяпленне ў жылым фондзе, паведамілі Sputnik на прадпрыемстве "Мінская гарадская жыллёвая гаспадарка".
З панядзелка ў Мінску адзначаецца пацяпленне. Тэмпература паветра ў дзённы час істотна падымаецца вышэй за +10 градусаў. Між тым ацяпляльны сезон у сталіцы пачаўся 9 кастрычніка. Да пачатку падачы цяпла ў кватэры мінчукі крытыкавалі гарадскія ўлады і нават размясцілі на сайце "Зручны горад" петыцыю з патрабаваннем змяніць нормы тэхнічнага кодэкса па ацяпленню.
"Тэмпература ў жылых дамах рэгулюецца аўтаматычна, у адпаведнасці з тэмпературай вонкавага паветра, таму для адключэння ацяплення ў сувязі з цёплым надвор'ем няма прычын", — паведамілі ў ГА "Мінская гарадская жыллёвая гаспадарка".
Там адзначылі, што весці гаворку аб рэжыме працеплівання некарэктна, паколькі ў кожным доме рэгуляванне тэмпературы цепланосбітаў адбываецца аўтаматычна і аўтаномна.
Занадта гарачыя батарэі ў кватэрах некаторых мінчукоў на прадпрыемстве патлумачылі магчымымі непаладкамі, звязанымі з пачаткам ацяпляльнага сезона, і параілі тым, у каго ў кватэрах занадта горача, звяртацца ў камунальныя службы па месцы жыхарства.
"Рашэнняў на ўзроўні гарадскіх уладаў па цэнтралізаваным адключэнні ацяплення не чакаецца", — падкрэслілі спецыялісты.
На прадпрыемстве таксама адзначылі, што, па прагнозах сіноптыкаў, у Беларусі ўжо ў самыя бліжэйшыя дні пахаладае.
