МІНСК, 3 ліс — Sputnik. Зрабіць сэлфі са льном і паўдзельнічаць у выратаванні ўраджаю расліны паклікалі ўсіх жадаючых журналісты Буда-Кашалёўскай газеты "Авангард".
Раённая газета абяцае бясплатную падпіску аўтарам трох самых незвычайных здымкаў. Звычайна лён прыбіраюць на пачатку восені, але сёлета пасяўную давялося правесці пазней, такім чынам, ссунуліся і тэрміны ўборкі. Да таго моманту, калі прыйшоў час убіраць лён, яго сцеблы ўжо прыбіла да зямлі дажджом.
"Нам не хапіла літаральна пяці дзён. Калі б не дажджы, мы б справіліся сваімі сіламі. Цяпер будзем удзячныя кожнаму, хто адгукнецца на наш заклік і дапаможа падняць лён", — распавёў дырэктар Уваравіцкага льнозавода Дзмітрый Чубанаў.
Усіх жадаючых выратаваць лён паклікалі на палі, каб дапамагчы ўручную падняць сцеблы і такім чынам трохі прасушыць іх перад уборкай. Сіламі адных аграрыяў выкананне гэтай задачы заняло б вельмі шмат часу.
Як раней паведамляў Sputnik, у Гомельскай вобласці афіцыйна аформілі мабілізацыю людзей на выратаванне лёну — аблвыканкам прыняў распараджэнне "Аб аказанні ўсебаковага садзейнічання адкрытаму акцыянернаму таварыству "Гомельлён" ад 31 кастрычніка за №350-р. Калоны аўтобусаў з офіснымі супрацоўнікамі, работнікамі заводаў, прадпрыемстваў, навучэнцамі накіроўваюць у Кармянскі, Рагачоўскі, Буда-Кашалёўскі і Чачэрскі раёны.
