МІНСК, 4 ліс — Sputnik. Беларускія лекары з двух найбуйнейшых медыцынскіх цэнтраў краіны распрацавалі ўнікальную методыку выратавання жыцця маці і дзіцяці ў рэдкай сітуацыі ўрастання плацэнты, паведамілі ў эфіры тэлеканала АНТ. Наватарства ў тым, што пасля хірургічнага ўмяшання жанчына захоўвае магчымасць нарадзіць дзіця зноў.
Пры такой паталогіі плацэнта, якая служыць крыніцай харчавання і дыхання дзіцяці, прымацоўваецца да іншых органаў. Можа ўзнікнуць унутраны крывацёк, які пагражае жыццю і маці, і нованароджанага. Беларускія спецыялісты з цэнтра "Маці і дзіця" і Цэнтра трансплантацыі органаў і тканак разам шукалі рашэнне праблемы.
"Нават для Еўропы падобнае аб'яднанне тэхналогій часцяком немагчыма. Таму што гэта дорага і недаступна. І наш вопыт ужо выклікаў зацікаўленасць нашых еўрапейскіх калег, мы атрымалі запрашэнне выступіць на Еўрапейскіх канферэнцыях", — распавёў Дзмітрый Юрлевіч, загадчык аддзялення Рэспубліканскага цэнтра трансплантацыі органаў і тканак.
У працэсе выратавання жанчыны і дзіцяці ўдзельнічаюць эндаваскулярныя хірургі, якія перакрываюць сасуды, каб правесці кесарава сячэнне практычна бяскроўна. Страта крыві ў такой сітуацыі можа быць смяротнай.
За аперацыяй назіраюць пятнаццаць спецыялістаў з абодвух цэнтраў. У Беларусі ўжо праведзена каля трыццаці такіх аперацый, але нядаўна лекары здолелі дамагчыся таго, каб пасля такога ўмяшання жанчына захавала дзіцянараджальную здольнасць.
