МІНСК, 7 ліс — Sputnik. Ідэя адкрыць магазін эксклюзіўнага хэндмэйду належыць гомельскай прадпрымальніцы Ліліі Калюжнай, Sputnik ацаніў асартымент гандлёвага аб'екта.
Гаспадыня незвычайнай гандлёвай кропкі называе "Сваю палічку" арт-пляцоўкай і запрашае заявіць пра сабе майстроў з усіх куткоў Беларусі.
Проста здаваць паліцы ў арэнду — сумна, прызнаецца Калюжная. Самародкаў вельмі шмат, і ў кожнага ёсць свая гісторыя прыходу ў рамесніцтва. Усё гэта вельмі цікава і нават карысна ведаць творчым людзям.
"Праект мае сацыяльную накіраванасць. Мы гатовы дапамагаць умельцам рэкламаваць сваю творчасць, запрашаць на майстар-класы, кансультаваць па пытаннях рамеснай дзейнасці", — тлумачыць нюансы прадпрымальніца.
Вялікія і маленькія паліцы здаюцца ў арэнду за сімвалічную плату. Пры гэтым рамеснікі атрымліваюць у добрым месцы горада стацыянарную афлайн-краму, а пакупнікі — выбар сувеніраў на любы густ і кашалёк.
Канвеерных рэчаў на паліцах няма. Калі гэта лялька, то абавязкова з бляскам у вачах, калі свяцільня, то "нелегальна знятая з упаўшага НЛА".
"На мяне незгладжальнае ўражанне зрабілі іконы, выкананыя ў тэхніцы дэкупаж. Я ў шоку, што іх аўтар доўгі час быў прыкаваны да ложка, і менавіта рамяство прымусіла яго падняцца", — прызнаецца першая наведвальніца Вікторыя Трухан.
Змешванне стыляў і матэрыялаў не палохае гамяльчанку Кацярыну Макараву. Майстар хэндмэйду абгрунтавалася на паліцах адной з першых. Кажа, удзел у праекце і асабіста Лілія Калюжная падганяюць тварыць, а не займацца штампоўкай сувеніраў.
"Па прафесіі я педагог мастацкіх дысцыплін. Усе мае лялькі "спісаны" з рэальных людзей. Попыт устойлівы, пакупнікі часта пазнаюць у маіх працах сябе ці знаёмых", — усміхаецца Кацярына.
Ілона Герасімава захапілася шматковым шыццём у дэкрэтным адпачынку. Кожны вечар, калі справы па доме зроблены, юрыст па адукацыі дастае кавалачкі тканіны і пачынае "збіраць" дзіцячыя пакрывалы да 2-3, а часам і 5-й гадзіны раніцы.
"Працую толькі з беларускімі матэрыяламі, перавагу аддаю ільну. "Паля палічка" — гэта добры піяр для рамеснікаў і месца сустрэч з цікавымі людзьмі", — дзеліцца ўражаннямі Ілона.
Аб сацыяльным баку праекта казалі практычна ўсе ўдзельнікі цырымоніі адкрыцця крамы. Бо ў краме можна не толькі прадаваць творы ручной працы. Паэты і музыкі таксама часта не могуць знайсці пляцоўку для самавыяўлення. "Свая палічка" гатовая стаць месцам прыцягнення творчых людзей.
Праект падтрымліваюць грамадскае аб'яднанне "Адзінства", абласная арганізацыя Беларускага саюза жанчын і каледж народных мастацкіх промыслаў.
