Беларускія памежнікі затрымалі ў пункце пропуску "Весялоўка" сям'ю расіян, у іх аўтамабілі ў багажніку пад кучай адзення была выяўленая 60-гадовая жанчына, паведамілі ў ДПК.
"У ходзе агляду іх аўтамабіля "Volkswagen" памежны нарад сумесна з супрацоўнікамі мытні выявіў "пасажыра", які яўна хацеў застацца незаўважаным. У багажніку, схаваўшыся пад кучай верхняга адзення, знаходзілася грамадзянка Украіны", — паведамілі Sputnik у пятніцу ў Дзяржаўным памежным камітэце.
Было ўстаноўлена, што жанчына даводзіцца маці расіянцы.
"У 60-гадовай жанчыны тэрмін дзеяння пашпарта скончыўся яшчэ ў сакавіку 2015 года. Жанчына патлумачыла, што пра неабходнасць замены дакумента яе папярэджвалі расійскія памежнікі яшчэ пры перасячэнні расійска-беларускай мяжы", — распавялі суразмоўцы агенцтва.
"Праз мяжу ўсе трое не прапушчаны. У дачыненні да кіроўцы і грамадзянкі Украіны распачаты адміністрацыйны працэс за замах на незаконнае перасячэнне дзяржаўнай мяжы", — сказалі ў ДПК.
Жанчына таксама будзе прыцягнута да адказнасці за парушэнне правілаў знаходжання на тэрыторыі Беларусі, удакладнілі памежнікі.
