МІНСК, 21 ліс — Sputnik. Абвешчаны нацыянальны конкурс "Мастацтва кнігі-2017", паведамілі ва ўпраўленні выдавецкай дзейнасці і гандлю Міністэрства інфармацыі Беларусі.
Конкурс пройдзе 17-18 студзеня, заяўкі ў кіраванні выдавецкай і паліграфічнай дзейнасці Мінінфарма прымаюцца да 12 студзеня.
Па кожнай намінацыі можа быць прадстаўлена не больш двух выданняў. Галоўная ўзнагарода нацыянальнага конкурсу "Мастацтва кнігі" Гран-пры будзе ўручана ў намінацыі "Трыумф". Пераможца атрымае дыплом імя Францыска Скарыны і памятны знак-сімвал "Вялікі залаты фаліянт".
Спецыяльных дыпломаў і памятных знакаў-сімвалаў "Малы залаты фаліянт" будуць удастоены выданні ў тэматычных намінацыях. Кнігі літаратурна-мастацкага кірунку — у намінацыі "ЛІТ-фармат", выданні вучэбнага кірунку — "Падручнік новага стагоддзя", фотаальбомы, фотакнігі — "Фотапозірк", для дзяцей і юнацтва — "Разам з кнігай мы расцем", даведнікі і энцыклапедыі — у намінацыі "Залатыя скрыжалі". Выданні па выяўленчым мастацтве, факсімільныя, рэпрынтныя, бібліяфільскія будуць прадстаўлены ў намінацыі "АРТ-кніга", навуковыя, навукова-папулярныя — "Эўрыка", выданні духоўна-асветнага напрамку — у намінацыі "Духоўнасць".
Таксама абвешчаны спецыяльныя намінацыі: "За ўнёсак у захаванне духоўнай спадчыны"; "Разам са Скарынай"; "Садружнасць" (сумесныя выдавецкія праекты); "У люстэрку часу" (кнігі, выдадзеныя па заказе). Прэтэндэнтамі на ўзнагароду ў персанальнай намінацыі "Майстэрства" могуць стаць ілюстратар кнігі, дызайнер кнігі, фотамастак, аўтар кнігі.
Нацыянальны конкурс "Мастацтва кнігі" (LVIІ) праводзіцца з мэтай вызначэння лепшых выдавецкіх праектаў, якія сталі падзеяй у нацыянальным кнігавыданні, павышэння мастацкай і паліграфічнай культуры беларускай кнігі, далейшага развіцця кніжнага мастацтва, папулярызацыі лепшых дасягненняў выдавецтваў рэспублікі за 2017 год.
