МІНСК, 23 ліс — Sputnik. Студэнцкая зборная БДУ і МДТУ імя М. Э. Баўмана (Расія) стала абсалютным пераможцам на VIII Міжнародным турніры прыродазнаўчых навук, паведамілі Sputnik у прэс-службе Белдзяржуніверсітэта.
Спаборніцтва праходзіла ў Санкт-Пецярбургскім дзяржаўным універсітэце.
У склад каманды ўвайшлі: чацвёртакурснікі хімічнага факультэта Вольга Сакалоўская, Аляксандра Фальчэўская, Уладзіслаў Кісін, біялагічнага факультэта Лізавета Кушнерава і студэнт Маскоўскага дзяржаўнага тэхналагічнага ўніверсітэта імя М. Э. Баўмана Мікалай Нагібін.
Кіраўніком зборнай выступіў аспірант Інстытута агульнай і неарганічнай хіміі імя М. С. Курнакова Расійскай акадэміі навук Канстанцін Сахараў.
"У фінале канкурсанты прадстаўлялі адну задачу міждысцыплінарнага характару: з галін хіміі, біялогіі і інжынерных навук. Яе рашэнне неабходна было адлюстраваць у прэзентацыі і абараніць перад удзельнікамі і членамі журы. Рэцэнзаванне і апаніраванне ажыццяўлялі студэнты з каманд супернікаў. Зборная "Энтрапія" прадставіла доследы з галіны фізікі. Гэта заданне канкурсантам прапанавала адна з расійскіх кампаній, якая распрацоўвае навуковыя наборы для дзяцей сярэдняга і старэйшага школьнага ўзросту", — распавялі ў прэс-службе ВНУ.
БДУ стаў адзінай ВНУ, якая прадстаўляла Беларусь на міжнародным спаборніцтве. Усяго ў ім удзельнічалі 28 каманд універсітэтаў Масквы, Санкт-Пецярбурга, Мінска, Новасібірска, Уфы, Іжэўска, Омска, Цюмені, Чалябінска, Белгарада, Варонежа, Екацярынбурга і Сімферопаля.
