МІНСК, 27 ліс — Sputnik. Расійская Федэрацыя збіраецца падаць заяўку на правядзенне дзіцячага "Еўрабачання" ў 2019 годзе, пакуль пытанне знаходзіцца на стадыі абмеркавання, паведамілі ў прэс-службе кампаніі "Першы канал. Сусветная сетка".
Расіянка Паліна Багусевіч з кампазіцыяй "Крылы" ў нядзелю заняла першае месца на конкурсе, які праходзіў у Тбілісі. Згодна з правіламі конкурсу краіна-пераможца не атрымлівае аўтаматычнага права на яго правядзенне ў наступным годзе — месца вызначаецца загадзя ў адпаведнасці з пададзенымі заяўкамі.
"У наступным годзе конкурс будзе праходзіць у Мінску, паколькі Беларусь заявіла аб жаданні праводзіць конкурс загадзя. Расія падасць заяўку на правядзенне гэтага мерапрыемства на 2019 год, пакуль гэта ў стадыі абмеркавання. Пасля падачы заяўкі камітэт EBU прыме рашэнне", — сказалі ў прэс-службе.
У наступным годзе дзіцячае "Еўрабачанне" пройдзе ў лістападзе на "Мінск-Арэне", за падрыхтоўку да яго правядзення адказвае намеснік прэм'ер-міністра Васіль Жарко.
У 2010 годзе Беларусь упершыню прымала ў сябе дзіцячае "Еўрабачанне". Тады еўрапейскі вяшчальны саюз высока ацаніў узровень падрыхтоўкі і арганізацыі мерапрыемства ў Мінску.
Рэспубліка ўдзельнічае ў Міжнародным дзіцячым конкурсе песні "Еўрабачанне" з моманту яго заснавання — з 2003 года. На нашым рахунку дзве перамогі — у 2005 і 2007 гадах. У нядзелю беларуская ўдзельніца Хелена Мерааі заняла ў дзіцячым "Еўрабачанні" ў Грузіі пятае месца, набраўшы 149 балаў.
