МІНСК, 5 сне — Sputnik. Афармленне сцэны міжнароднага конкурсу песні "Еўрабачанне-2018", які пройдзе ў маі ў сталіцы Партугаліі Лісабоне, прадставілі ў аўторак у Еўрапейскім вяшчальным саюзе (ЕВС).
Партугалія атрымала права правесці наступнае "Еўрабачанне" па выніках конкурсу 2017 года, у якім перамог прадстаўнік краіны — Сальвадор Сабрал. Да правядзення наступнага шоу застаецца паўгода, аднак падрыхтоўка да яго ўжо ідзе.
У аўторак ЕВС прадставіў дызайн сцэны, якая будзе збудаваная для "Еўрабачання-2018" у Лісабоне. Аўтарам афармлення сцэны выступіў немец Фларыян Відэр — ён жа займаўся распрацоўкай дызайну пляцовак для правядзення конкурсу ў Кіеве, Баку, Вене і Дзюсельдорфе.
Як распавялі ў прэс-службе арганізатараў "Еўрабачання", дызайнер натхняўся сімваламі Партугаліі — навігацыяй, морам, караблямі і картамі. Абыграна марская тэматыка і ў лагатыпе, і ў дэвізе будучага конкурсу.
Арганізатары і дызайнер упэўнены: сцэна будзе элегантнай, але ў той жа час тэхналагічнай і сучаснай. Тэхнічныя характарыстыкі пляцоўкі ЕВС не называе, аднак, хутчэй за ўсё, вялікая яе частка будзе са святлодыёдных экранаў — для стварэння спецэфектаў у прамым эфіры.
Удзел у "Еўрабачанне-2018" пацвердзілі 43 краіны, сярод якіх і Беларусь, якая неўзабаве абярэ свайго прадстаўніка на прэстыжным конкурсе. На шоу 2017 года прадстаўнікі рэспублікі, група NaviBand, занялі 17-е месца.
