МІНСК, 8 сне — Sputnik. Выхад восьмага сезона тэлесерыяла "Гульня тронаў" запланаваны на 2019 год, распавяла выканаўца ролі Сансы Старк актрыса Сафі Цёрнер у інтэрв'ю часопісу Variety.
Гэтая навіна, выпадкова расказаная актрысай (звычайна выхад сезону анансуецца афіцыйна) моцна засмуціла прыхільнікаў серыяла — аказваецца, доўгачаканай прэм'еры апошняга, заключнага сезону "Гульні тронаў" прыйдзецца чакаць цэлы лішні год — звычайна сезоны выпускаліся штогод.
Актрыса таксама прызналася ў інтэрв'ю, што "вельмі ўсхваляваная", але чым менавіта — не ўдакладніла. Хутчэй за ўсё, фіналам серыяла, які ёй ужо вядомы.
Канцоўка серыяла застаецца галоўнай інтрыгай многіх гадоў — на серверы і сістэмы кампаніі НВО штогод прадпрымаецца нямала хакерскіх нападаў, каб выведаць хоць якую-небудзь інфармацыю аб маючых адбыцца серыях і ўжо тым больш аб фінале сагі. Прадстаўнікі HBO не раз заяўлялі, што ў іх ёсць некалькі варыянтаў развязак.
Серыял "Гульня тронаў" выходзіць з 2011-га года. Ён створаны па раманах пісьменніка Джорджа Марціна "Песня лёду і полымя". Сёмы сезон быў паказаны ў 2017 і стаў адным з самых папулярных у свеце, а апошняя серыя ўстанавіла абсалютны рэкорд — яе адначасова глядзела 16,5 мільёнаў тэлегледачоў.
