МІНСК, 19 сне — Sputnik. Барысаўскі клуб БАТЭ зацверджаны пераможцам чэмпіянату Беларусі па футболе, гэта рашэнне было прынята ў аўторак на пасяджэнні выканаўчага камітэта Беларускай федэрацыі футбола.
"Кропка ў напружаным і поўным інтрыг сезоне пастаўлена! Залатыя медалі вышэйшай лігі ўручаць ФК БАТЭ", — гаворыцца ў паведамленні на афіцыйным сайце клуба.
Барысаўчане ў 14-ы раз атрымаюць залатыя медалі за перамогу ў рэспубліканскім першынстве. Прычым БАТЭ выйграе чэмпіянат Беларусі ўжо 12-ы раз запар.
У клубе таксама адзначылі, што АБФФ назвала і ўладальнікаў індывідуальных і камандных намінацый, сярод якіх шмат узнагарод атрымаюць прадстаўнікі "жоўта-сініх".
Пасяджэнне АБФФ некалькі разоў пераносілася з-за неправамернай гульні ў матчы са "Слуцкам" галкіпера барысаўчан Сяргея Верамко, за што клуб быў пакараны тэхнічнай паразай. У выніку ачкі з БАТЭ не знялі, аднак пакаралі штрафам у памеры каля 23 тысяч долараў.
