МІНСК, 28 сне — Sputnik. Беларусь і Еўрасаюз працягваюць перамовы аб спрашчэнні візавага рэжыму для беларускіх грамадзян. У Мінску спадзяюцца, што шэнген патаннее ўжо ў 2019 годзе, заявіў кіраўнік дэпартамента па грамадзянстве і міграцыі МУС палкоўнік міліцыі Аляксей Бягун.
Нагадаем, што працэс перамоў паміж Мінскам і ЕС аб зніжэнні кошту шэнгенскай візы ідзе на працягу апошніх сямі гадоў.
"Мы скончылі перамовы і кансультацыі з прадстаўнікамі Еўрапейскага саюза па адпаведным пагадненні аб спрашчэнні візавых фармальнасцей, яно цалкам узгоднена і гатова да парафіравання і ўнутрыдзяржаўных працэдур", — паведаміў Бягун у інтэрв'ю міліцэйскай газеце "На страже".
Паводле яго слоў, засталося яшчэ некалькі нявырашаных пытанняў. Бягун удакладніў, некаторыя з гэтых нявырашаных пытанняў "факусуюцца ў галіне палітычных дэкларацый", якія прадстаўнікі ЕС хочуць закласці ў пагадненне аб спрашчэнні візавых фармальнасцей.
Кіраўнік дэпартамента адзначыў, што апошні раўнд перамоваў павінен адбыцца ў бліжэйшай будучыні.
Па словах Бягуна, ёсць пацяпленне адносін па некаторых напрамках паміж Беларуссю і ЕС і з улікам гэтага пасля падпісання адпаведных дакументаў ужо ў 2019 годзе грамадзяне Беларусі змогуць плаціць за візы істотна менш.
