МІНСК, 31 сне — Sputnik. Прэзідэнт Беларусі Аляксандр Лукашэнка падпісаў указ з задачамі па развіцці краіны ў 2018 годзе, паведамілі Sputnik ў прэс-службе кіраўніка дзяржавы.
Указ "Аб задачах сацыяльна-эканамічнага развіцця Рэспублікі Беларусь на 2018 год" быў падпісаны ў апошні дзень 2017 года. Таксама Лукашэнка зацвердзіў рэспубліканскі бюджэт і асноўныя палажэнні крэдытна-грашовай палітыкі.
Галоўныя цэлі ў Беларусі на 2018-ы — павышэнне канкурэнтаздольнасці эканомікі, устойлівы эканамічны рост і стварэнне ўмоў для яго паскарэння ў будучыні.
Зацвердзіў указам Лукашэнка і шэраг параметраў, якія паказваюць эфектыўнасць урада і Нацбанка ў наступным годзе.
Так, рост ВУП у 2018-ым павінен скласці 3,5%, а экспарту тавараў і паслуг — 5,7%. Цэны павінны вырасці не больш чым на 6%.
Беларускі ўрад павінен будзе і далей працаваць над эканамічна абгрунтаваным ростам заробкаў і стварэннем высокапрадукцыйных працоўных месцаў.
Міжрэгіянальную дыферэнцыяцыю ва ўзроўні і якасці жыцця насельніцтва ў наступным годзе неабходна скараціць. Будуць закладзены і падставы для далейшага паляпшэння сітуацыі ў нацыянальнай эканоміцы, а таксама шэраг іншых мер.
