У Мінску ў 2019 годзе пройдуць ІІ Еўрапейскія гульні, падрыхтоўку да маштабнага спартыўнага форуму абмеркавалі ў мультымедыйнай прэс-цэнтры Sputnik.
Беларусь актыўна рыхтуецца да правядзення Гульняў, паведаміў намеснік дырэктара Дырэкцыі II Еўрапейскіх гульняў Анатоль Котаў. Паводле яго слоў, Еўрапейскія гульні сталі для нашай краіны выклікам. Разам з тым, гэта не толькі спартовае мерапрыемства, яно мае і вялікую культурную частку.
"Беларусь павінна паказаць усё багацце сваёй культуры і гісторыі", — адзначыў намеснік кіраўніка дырэкцыі Гульняў.
04:00 — 06:40 (хранаметраж на відэа) — Анатоль Котаў аб працоўных мовах на Еўрапейскіх гульнях і арганізацыйных момантах.
Намеснік кіраўніка распавёў, што нягледзячы на тое, што афіцыйнай мовай Гульняў стала англійская, у рабоце дырэкцыі выкарыстоўваюцца беларуская і руская мова як дзяржаўныя. Пры падрыхтоўцы рэкламных матэрыялаў выкарыстоўваюцца ўсе тры мовы.
7:36- 14:25 - Аб стратэгічных кірунках і задачах, якія ставіць перад сабой дзяржава ў інфармацыйным асяроддзі.
"У міністэрстве інфармацыі ўспрымаюць Еўрапейскія гульні як вельмі магутную PR-кампанію, якую мы павінны правесці ў падтрымку іміджу краіны", — падкрэсліў намеснік міністра інфармацыі Павел Лёгкі.
Паводле яго слоў, упор будзе зроблены на сацыяльныя сеткі і благасферу. Будуць праведзены прэс-туры для расійскіх, кітайскіх СМІ.
15:00 — 20:23 - Пра ролю і месца беларускай мовы і культуры ў павышэнні пазнавальнасці Беларусі ў свеце.
"Першай візітоўкай краіны з'яўляецца нацыянальная мова. У гэтым лёгка пераканацца, перасякаючы межы. Важна, каб у турыстаў падчас Еўрапейскіх гульняў склалася ўражанне, што яны падарожнічалі менавіта па Беларусі", — падкрэсліла дэпутат Палаты прадстаўнікоў Рэспублікі Беларусь Алена Анісім.
Паводле слоў дэпутата, выкарыстанне беларускай мовы павышае імідж краіны ў прадстаўленні ўсяго свету. Разам з тым, важна забяспечыць выкарыстанне іншых замежных моў.
Краіна замкаў
20:26 — 24:00 - Аб стварэнні турыстычных маршрутаў, якія пазнаёмяць гасцей Еўрапейскіх гульняў з гісторыяй і культурай Беларусі
"Першы маршрут я б назваў "Беларусь — краіна замкаў", — заявіў гісторык, ганаровы старшыня "Таварыства беларускай мовы" Алег Трусаў.
Гісторык пералічыў чатыры замкі, якія можна наведаць на працягу аднаго дня. Сёння цалкам гатовыя прымаць турыстаў Нясвіжскі і Мірскі замак.
На думку Алега Трусава, прывесці ў парадак Лідскі замак можна было б на працягу аднаго года. Пэўныя пытанні маюцца па захаванасці замка ў Наваградку.
Мінск — зоны гасціннасці
24:03 —26:20 — Аб падрыхтоўцы Мінска да Еўрапейскіх гульняў як галоўнай пляцоўкі па правядзенні маштабных спартыўных спаборніцтваў.
"Плануецца арганізаваць зоны гасціннасці і фан-зоны, дзе будзе арганізавана прадстаўленне гісторыі і культуры Беларусі. Таксама будуць працаваць музей і выставы", — распавёў намеснік начальніка ўпраўлення культуры і ідэалагічнай работы Мінгарвыканкама Аляксандр Шастакоў.
На асноўных спартыўных пляцоўках будуць арганізаваныя зоны актыўнасці, якія будуць тэматычна аформленыя. Гэта ўсё будзе прадугледжана, дзякуючы комплекснаму падыходу.
Беларуская мова — перш за ўсё
26:30 — 31:28 - Якую ролю адыгрывае ў прэзентацыі беларуская мова і як яна павінна быць прадстаўлена ў дзяржаўнай прэсе.
Галоўны рэдактар газеты "Народная воля" Іосіф Сярэдзіч выступіў з крытыкай на адрас "Народнай газеты" і "Мінскай праўды", якія практычна не выпускаюць артыкулы на беларускай мове.
"Раней раённыя газеты за выключэннем некалькіх выдаваліся стоадсоткава на беларускай мове", — нагадаў Іосіф Сярэдзіч.
Паводле яго слоў, абласныя газеты за выключэннем Брэста і Гродна таксама выходзілі на беларускай мове.
Галоўны "Народнай волі" заклікаў Міністэрства інфармацыі Беларусі вярнуць у друк беларускую мову.
Пад грыфам сакрэтна
39:30 — 46:46 — Аб магчымым выступе на цырымоніі адкрыцця Еўрапейскіх гульняў легендарных удзельнікаў "Песняроў" і сакрэтнасці пры падрыхтоўцы.
"Кожны дзень я адчуваю на сваіх плячах велічэзную адказнасць", — адзначыў рэжысёр-пастаноўшчык Еўрапейскіх гульняў Аляксандр Вавілаў.
Паводле яго слоў, цырымонія адкрыцця заклікана паказаць, што ў нас ёсць гонар за сябе, сваю зямлю і культуру, якая ў нас ёсць.
Аляксандр Вавілаў адзначыў, што дакументы, якія распісваюць правядзенне мерапрыемства, носяць грыф "сакрэтна".
"У мяне ёсць мара — сабраць разам "Песняроў". Яны знаходзілі прычыны адмовіцца, яны людзі", — сказаў рэжысёр.
Паводле яго слоў, ён хоча расказаць усім аб тым, як любіць Мінск і пра беларускую культуру так, як ён яе бачыць.
"Гэта ўнікальная магчымасць размаўляць з Еўропай", — падкрэсліў рэжысёр-пастаноўшчык Еўрапейскіх гульняў.
Еўрапейскія гульні 2019 пройдуць у Мінску з 21 па 30 чэрвеня. Больш за чатыры тысячы атлетаў з 50 краін выступяць у 15 відах спорту і 23 дысцыплінах.
Поўную версію размовы экспертаў аб тым, як Беларусь рыхтуецца да II Еўрапейскім гульняў 2019 года, глядзіце на відэа.
