МІНСК, 15 лют – Sputnik. Тры беларускія кухары ў рамках праекта "Давайце проста прыдумаем" стварылі тузін новых беларускіх страў і гатовыя прадставіць іх на народны суд.
Тры беларускія кухары — Антон Каленік (Minsk Marriott Hotel), Аляксей Радзько (TokiNY) і Раман Зубкоў (Spoon) прыдумалі 12 страў, уключаючы першае, другое, дэсерты і закускі. Беларусам прапануюць пакаштаваць каляровы суп-зацірку, закрытыя піражкі-кнышы, сырнікі, якія больш нагадваюць пірожнае, "Мудрагелісты торт" з бульбы і смятаны, хрумсткія трубачкі з бліновага грачанага тэсту і іншыя.
"Масленічнае меню даўно трэба было абнавіць новымі арыгінальнымі і досыць простымі стравамі, застаючыся ў рамках нацыянальных кулінарных традыцый", — сказала Юлія Панізнік, ініцыятар праекта.
Галоўнай мэтай кухараў было зрабіць стравы смачнымі і простымі ў гатаванні.
Ацаніць прапанаваныя змены ў традыцыйным масленічным меню можна будзе на гуляннях, якія пройдуць 17 лютага з 10:00 да 20:00 у Мінску, Віцебску і Магілёве, а 18 лютага — у Гомелі і Брэсце.
