МІНСК, 21 лют — Sputnik. Высечка ўладамі Польшчы дрэў у Белавежскай пушчы з'яўляецца незаконнай і можа прывесці да негатыўных наступстваў для экасістэмы рэгіёну, заявіў генеральны адвакат суда ЕС Іў Бот.
Канфлікт з-за высечкі дрэў у Белавежскай пушчы разгарэўся вясной 2017 года: тады Польшча агучыла свае планы па знішчэнні каля 1,3 мільёна раслін, заражаных жуком-караедам. Эколагі настойвалі: дрэвы павінны аднавіцца натуральным чынам. Занепакоенасць выказвала і Беларусь, якая "дзеліць" з Польшчай Белавежскую пушчу — гэты аб'ект занесены ў спіс Сусветнай прыроднай спадчыны ЮНЕСКА.
З пачатку лютага Польшча прыпыніла высечку ў Белавежскай пушчы, аднак іск Еўракамісіі да ўладаў краіны застаецца ў сіле. Сваю пазіцыю па гэтым пытанні выказаў генеральны адвакат суда Еўрасаюза Іў Бот.
Па словах юрыста, Польшча парушае заканадаўства Еўрасаюза высечкай пушчы, а ў цэлым такое рашэнне польскіх уладаў можа нашкодзіць экасістэме рэгіёну. Таксама Бот адзначыў: дзеянні ўладаў Польшчы нельга апраўдаць ростам папуляцыі жука-караеда, бо навукоўцы да гэтага часу не прыйшлі да адзінага меркавання ў тым, якія сродкі лічыць найбольш эфектыўнымі ў барацьбе з ім.
На працягу некалькіх тыдняў суд Еўрасаюза прыме рашэнне па гэтым пытанні. Як правіла, ён падтрымлівае пазіцыю генеральнага адваката. Зрэшты, гэта рашэнне будзе толькі фармальным "пакараннем", бо Еўракамісія вырашыла не патрабаваць фінансавых санкцый.
