МІНСК, 5 сак — Sputnik. Для больш якаснай падрыхтоўкі спартсменаў і папулярызацыі зімовых відаў спорту ў Мінску плануецца пабудаваць дадатковыя трэніровачныя аб'екты, паведаміла прэс-служба прэзідэнта Беларусі.
Падчас наведвання фіналу рэспубліканскіх спаборніцтваў "Снежны снайпер" Аляксандр Лукашэнка расказаў журналістам, што могуць пабудаваць у беларускай сталіцы для аматараў зімовых відаў спорту.
"Мы хочам у горадзе пабудаваць — у фінаў і шведаў падгледзелі — двухпавярховы будынак даўжынёй 100 метраў, у ім пятля — 1200 метраў. Ён аснежваецца ўнутры, людзі прыходзяць, займаюцца: хтосьці бегае па звілістай трасе, хтосьці каву п'е", — сказаў Лукашэнка.
Паводле слоў прэзідэнта, у Рэспубліканскім цэнтры алімпійскай падрыхтоўкі па зімовых відах спорту "Раўбічы" ўзвядуць тунэль са штучным снегам унутры.
"Там мінусавая тэмпература і штучны снег круглы год. У Фінляндыі, Швецыі, ды і ў Піцеры пабудавалі такую трубу. Мы зробім лепш, гэта нядорага", — адзначыў кіраўнік дзяржавы.
Акрамя таго, Лукашэнка падкрэсліў, што спаборніцтвы "Снежны снайпер" дапамагаюць не толькі навучыць дзяцей любіць спорт, але і адабраць здольных рабят.
"Каштоўнасць гэтых спаборніцтваў — у тым, што гэтыя лепшыя дзеткі, гэтыя зярняткі нашай краіны, узяты на кантроль трэнерамі. Мы абавязкова зробім усё, каб з іх у будучыні выраслі Домрачавы, Бьерндалены, Айдаравы, Паповы — вялікія спартсмены", — заявіў прэзідэнт.
Таксама падчас размовы з журналістамі Лукашэнка пракаментаваў выступ свайго малодшага сына Мікалая на турніры і падрыхтоўку беларускіх атлетаў да Алімпійскіх гульняў 2018.
