МІНСК, 15 сак — Sputnik. Асноўны закон краіны — Канстытуцыя — замацоўвае права беларускага народа вызначаць свой лёс і прымаць найбольш важныя рашэнні, заявіў прэзідэнт Беларусі Аляксандр Лукашэнка.
Кіраўнік дзяржавы павіншаваў суайчыннікаў з днём Канстытуцыі, які ў Беларусі адзначаецца 15 сакавіка. У Беларусі дзейнічае Канстытуцыя 1994 года са зменамі і дапаўненнямі, прынятымі на рэспубліканскім рэферэндуме 24 лістапада 1996 года і 17 кастрычніка 2004 года. Яна была прынята 15 сакавіка 1994 года на 13-й сесіі Вярхоўнага Савета Рэспублікі Беларусь 12-га склікання і з'яўляецца першай у гісторыі суверэннай рэспублікі і пятай па ліку Канстытуцыяй Беларусі, прынятай пасля Кастрычніцкай рэвалюцыі 1917 года.
"Умацаванне суверэннай дзяржаўнасці, дасягненне грамадскай згоды і сацыяльна-палітычнай стабільнасці непарыўна звязаны з канстытуцыйным правам беларускага народа вызначаць свой лёс і прымаць найбольш важныя рашэнні", — сказана ў віншаванні кіраўніка дзяржавы. Там таксама адзначана, што з асноўным законам, які замацаваў важнейшыя прынцыпы ўладкавання грамадства і дзяржавы, звязана рэалізацыя такіх каштоўнасцей, як законнасць, роўнасць, справядлівасць і народаўладдзе.
Прэзідэнт выказаў упэўненасць, што і ў далейшым ўдасканаленне канстытуцыйнай дэмакратыі, якое адпавядае сучасным патрэбам развіцця Беларусі, павінна будавацца ў першую чаргу з улікам інтарэсаў як асобнага чалавека, так і грамадства ў цэлым.
Лукашэнка пажадаў суграмадзянам здароўя, шчасця і поспехаў ва ўсіх пачынаннях на карысць Радзімы.
