МІНСК, 19 сак – Sputnik. Беларускі музыкант і кампазітар Георгій Сасноўскі быў узнагароджаны медалём Францыска Скарыны, пра гэта Sputnik паведамілі ў прэс-службе Міністэрства замежных спраў Рэспублікі Беларусь.
Цырымонія ўручэння медаля прайшла 15 сакавіка ў Францыі, дзе зараз жыве музыкант.
"У адпаведнасці з указам прэзідэнта Рэспублікі Беларусь Георгій Сасноўскі ўзнагароджаны медалём Францыска Скарыны за значны асабісты ўклад у папулярызацыю айчыннай культуры за мяжой і падтрымку маладых беларускіх музыкантаў", — паведамілі ў прэс-службе.
Узнагароду ўручыў пасол Беларусі ў Францыі Павел Латушка. Ён адзначыў, што беларуская дыяспара ў Францыі актыўна аказвае садзейнічанне развіццю беларуска-французскага супрацоўніцтва як у эканамічнай, так і ў культурнай сферы.
Сасноўскі і ўзначальваемая ім асацыяцыя рэгулярна арганізоўвае мерапрыемствы, накіраваныя на прасоўванне і папулярызацыю беларускай культуры ў Францыі, а таксама ў Беларусі, Бельгіі і Вялікабрытаніі. Пры непасрэдным удзеле беларускага кампазітара ў 2016 і 2017 гг. сумесна з Пасольствам Беларусі ў Францыі былі арганізаваны і праведзены Першыя і Другія музычныя сезоны Беларусі ў Францыі.
Акрамя таго, Георгій Сасноўскі за ўласны кошт выплачвае стыпендыі маладым таленавітым беларускім музыкам – студэнтам Беларускай дзяржаўнай акадэміі музыкі.
Пасля ўрачыстай цырымоніі адбыўся канцэрт класічнай музыкі ў выкананні Георгія Сасноўскага і яго вучняў. Прагучалі як класічныя творы, так і творы беларускага кампазітара.
У прэс-службе таксама паведамілі, што адначасова прайшоў вернісаж беларускіх мастакоў – удзельнікаў славутай выставы "Арт Капітал", якая прайшла ў лютым бягучага года ў Гранд Пале ў Парыжы. У гэтым годзе ў ёй прынялі ўдзел 14 беларускіх мастакоў.
