МІНСК, 21 сак — Sputnik. Хакейны клуб "Дынама-Мінск" заняў трэцяе месца па наведвальнасці хатніх матчаў у Еўропе, паведамілі Sputnik у прэс-службе "зуброў".
Міжнародная федэрацыя хакея (ІІХФ) апублікавала штогадовы рэйтынг наведвальнасці еўрапейскіх клубаў і ліг па выніках рэгулярных чэмпіянатаў.
Першае месца ў рэйтынгу належыць швейцарскаму "Берну" (16 371 заўзятар), клуб узначальвае топ ужо 16 гадоў. Другое месца займае СКА з Санкт-Пецярбурга (11 847). Трэці радок належыць мінскаму "Дынама" (11 738). Дзесятку найлепшых замкнула пражская "Спарта" (8708).
"Адзначым, што іншых беларускіх клубаў у першай сотні рэйтынгу няма", — звярнулі ўвагу ў "Дынама".
Сярод хакейных ліг лідзіруе швейцарская NLA (6833). Другое месца займае КХЛ (6234), трэцяе — нямецкая DEL (5996). Чэмпіянат Беларусі размясціўся на 20-й пазіцыі (371). Экстралігу апярэдзілі нават чэмпіянаты Іспаніі, Галандыі/Бельгіі і Венгрыі/Румыніі.
Мінскае "Дынама" ў гэтым сезоне КХЛ заняло дзесятае месца ў Заходняй канферэнцыі і не змагло прабіцца ў плэй-оф Кубка Гагарына.
