У выходныя над Мінскам з'явіцца сонца, а тэмпература ў нядзелю ўзнімецца да + 7°С. Надыходзячая вясна — добрая нагода не сядзець дома, а схадзіць на маштабнае сімфанічнае шоу, кававы фестываль або выставу, паўдзельнічаць у інтэлектуальным батлы ў гандлёвым цэнтры ці купіць штосьці на кірмашы з handmade-дробязямі. Sputnik сабраў самыя цікавыя падзеі 24-25 сакавіка.
Маштабнае сімфанічнае шоу з сусветнымі хітамі
У КЗ "Мінск" (вул. Кастрычніцкая, 5) вечарам 25 сакавіка можна будзе паслухаць сімбіёз рока, электронікі, папулярнай і класічнай музыкі ў выкананні ўкраінскага Prime Orchestra, на рахунку якіх каля 200 канцэртаў у сямі краінах свету.
Музыкі едуць у сталіцу з новай праграмай: прагучаць хіты Майкла Джэксана, Элтана Джона, Стынга, груп Depeche Mode, Prodigy, Imagine Dragons і многіх іншых. Дапоўняць выступленне грандыёзнае, па словах арганізатараў, светлавое шоу і спецэфекты. Кошт квітка — ад 15 да 125 рублёў.
Вялікі кававы фестываль
У ГЦ Galleria Minsk (пр. Пераможцаў, 9) на ўсе выхадныя разгорнецца бясплатны Coffee Fest Belarus. Гасцей чакае шэсць нацыянальных чэмпіянатаў сярод барыста, тры дзесяткі майстар-класаў для прафесіяналаў і аматараў кавы, дванаццаць кававых лакацый, больш за 100 гатункаў кавы, дэгустацыі і капінгі, а таксама зоны творчасці для дзяцей і іх бацькоў.
Велікодны фестываль
Міжнародны велікодны фестываль "Радасць" у Палацы мастацтваў (вул. Казлова, 3) ужо ідзе і будзе доўжыцца да пачатку красавіка. Мерапрыемства аб'ядноўвае ў сабе духоўную, культурную, дзіцячую і дабрачынную праграмы, а таксама велікодную выставу-кірмаш падарункаў. Будуць арганізаваны творчыя пляцоўкі, канцэрты і фотагалерэя, а ў дзіцячай гасцінай можна паслухаць казкі, паглядзець спектаклі.
Дзень лесу ў мінскім заапарку
У суботу ў сталічным заапарку (вул. Ташкенцкая, 40) адзначаць Міжнародны дзень лесу. Усіх клічуць паўдзельнічаць у займальнай гульні-падарожжы "Сцежка Берандзея" і наведаць тэматычныя экскурсіі. Таксама тут пройдуць майстар-клас па вырабе цацак для жывёл і паказальныя кармленні. Кошт наведвання — 9 рублёў.
Інтэлектуальны батл у гандлёвым цэнтры
У ТРЦ Galileo (вул. Бабруйская, 6) у суботу адбудзецца шоу-гульня для ўсіх жадаючых. Можна не толькі весела правесці час, але бліснуць эрудыцыяй і выйграць прыз. Адзін супраць аднаго стануць змагацца дзве каманды мінімум па чацвёра ўдзельнікаў. У кожным з чатырох раўндаў трэба будзе вырашыць вясёлыя задачкі на логіку і інтуіцыю, адказаць на мудрагелістыя пытанні.
Выставы: віртуальная рэальнасць і графіка Далі
На працягу ўсіх выхадных у ГЦ Dana Mall (вул. Пятра Мсціслаўца, 11) адкрыта інтэрактыўная выстава Future Live. У акулярах віртуальнай рэальнасці прапануюць зірнуць на свет, населены незямнымі істотамі, чароўнымі кветкамі і іншапланетнымі раслінамі. За наведванне трэба будзе заплаціць ад 10 да 18 рублёў (ёсць больш выгадныя сямейныя білеты).
А ў ангары Ok16 (вул. Кастрычніцкая, 16) працягваецца мультымедыйная выстава-шоу "Імпрэсіянізм.LIVE" з сотні карцін. Праект створаны спецыялістамі з Вялікабрытаніі, Літвы і Беларусі ў фармаце выставы з "жывымі" палотнамі і мноствам спецэфектаў. Квіток абыйдзецца ў 5-12 рублёў.
Кірмаш з дызайнерскімі рэчамі
У гандлёвым цэнтры "Скала" (вул. П. Глебкі, 5) на выхадных зноў разгорнецца кірмаш падарункаў ручной работы "Гарошак Маркет", дзе можна будзе купіць арыгінальныя handmade-рэчы. Майстры прадставяць масу ўпрыгожванняў і аксесуараў, прадметы інтэр'еру і розныя мілыя дробязі. Уваход вольны.
Новыя фільмы
Традыцыйна ў чацвер у пракат выйшла некалькі кінапрэм'ер. Увесь уікэнд у большасці кінатэатраў горада будуць паказваць такія карціны, як прыгодніцкі баявік "Ціхаакіянскі рубеж 2", драма "Гонка стагоддзя", фільм жахаў "Незнаёмцы: жорсткія гульні", а таксама анімацыйныя стужкі "Трус Пітэр" і "Дзікія продкі". Некалькі кінатэатраў працягнуць паказы карцін "Лэдзі Бёрд" і "Тры білборда на мяжы Эбінга, Місуры".
