Аб космасе мараць ужо не ўсе дзеці, але пра тое, каб пагутарыць з касманаўтам — амаль кожны. Фіналісты конкурсу малюнкаў пра неба "Палёт у будучыню" атрымалі такую магчымасць.
Дзевяць касманаўтаў з розных краін літаральна спусціліся да іх з неба, прыляцелі на верталёце. Прызналіся, што ў космасе не так шумна, як было ў кабіне, а касманаўт родам з Беларусі Алег Навіцкі распавёў — з верталёта Мінска такі ж прыгожы, як з космасу.
Карэспандэнты Sputnik пабывалі на сустрэчы з касманаўтамі і разам з дзецьмі аддаліся марам пра палёты.
Касмічны разносчык піцы і самалёт-курорт
Алег Навіцкі правёў у космасе 340 сутак, 10 гадзін і 3 хвіліны, і пасля гэтага яго чакае яшчэ адно выпрабаванне — узначаліць журы і выбраць лепшы малюнак. Больш за тысячу чатырыста прац даслалі на конкурс школьнікі Беларусі — там і савецкія касманаўты, і міжпланетныя станцыі, самалёт-курорт і паветраны паштовы шар, крылаты разносчык піцы і касмічная велапрагулка.
Мары дзяцей аб небе і космасе не абмежаваныя законамі фізікі, амаль як жук, які лётае насуперак вядомым законам аэрадынамікі. А каб мары пра космас не заставаліся фантазіямі, касманаўты вырашылі натхніць дзяцей не толькі маляваць, але і вывучаць навуку і інжынерную справу, каб рэалізаваць хаця б частку сваіх фантазій.
Сам Навіцкі распавёў, што яго дзіцячыя мары пра космас амаль не адрозніваліся ад таго, што ён убачыў на арбіце. Аб палёце на Марс касманаўт не марыў.
"Я рэаліст", — смяецца Навіцкі.
Адзінай альтэрнатывай космасу ён лічыў для сябе прафесію лётчыка, але космас перамог.
Пакуль дзеці і дарослыя спрабавалі сфатаграфавацца з касманаўтамі, самі яны фатаграфавалі дзіцячыя фантазіі і малюнкі.
"Будучыня для дзяцей гэта прыкладна той час, калі яны будуць у маім узросце. І я думаю, да гэтага часу яны ўбачаць, як многае з таго, што яны намалявалі, рэалізуецца. Пройдзе час, але многае атрымаецца", — распавёў Sputnik астранаўт з Германіі Герхард Тыле.
Усё лепшае і Ан-2 — дзецям
Міжнародны конкурс дзіцячага малюнка "Палёт у будучыню" арганізавала Беларуская федэрацыя авіяцыйнага спорту.
Пераможца паедзе на конкурс у Швейцарыю, а пакуль дзеці змагаліся за прызы, якія літаральна падымць іх у неба — сярод прызоў палёт на самалёце і нават скачок з парашутам. Усіх сорак пяць фіналістаў чакаў палёт на самалёце Ан-2.
"Каму як не Алегу Навіцкаму меркаваць, якім будзе палёт будучыні", — распавёў прэс-сакратар федэрацыі авіяцыйнага спорту Аляксандр Садоўнікаў.
Пакуль журы разглядалі працы, дзеці і іх бацькі практыкаваліся ў кіраванні дронаў і фатаграфаваліся з больш сур'ёзнымі машынамі — самалётамі і верталётамі.
"Я намалявала геалагічную станцыю, на ёй будуць працаваць геолагі, збіраць узоры грунту. Я б там не працавала, занадта складана", — прызналася васьмігадовая Аляксандра Сімуткіна з Барысава.
Яе сяброўка Мілана Букацік бачыць у палётах прыкладное значэнне — яна спадзяецца, што хутка вынайдуць паветраныя таксі, на якіх можна будзе паляцець куды заўгодна. Нават у мастацкую студыю.
