МІНСК, 28 сак — Sputnik. Міністэрства адукацыі вызначыла патрабаванне для тых, хто паступае ў класы павышанага ўзроўню, адпаведную пастанову ведамства апублікавала ў сераду на НЦПІ.
Класы з паглыбленым вывучэннем асобных прадметаў арганізоўваюцца ва ўсіх школах рэспублікі, аднак да гэтага часу быў няясны механізм залічэння ў гэтыя класы.
Як вызначыла Міністэрства адукацыі, для вучобы ў класе павышанага ўзроўню сярэдні бал атэстата ў вучня павінен быць не менш за шэсць балаў.
Акрамя таго, для вучобы ў старэйшых класах на павышаным узроўні неабходна па завяршэнні другой ступені навучання (пятыя-дзевятыя класы) мець адзнакі не ніжэй за сем балаў па прадметах, якія рабяты хочуць вывучаць дадаткова.
Групы вывучэння прадметаў на павышаным узроўні будуць стварацца як у старэйшай, так і ў сярэдняй школе.
Нагадаем, у канцы студзеня прэзідэнт адмяніў іспыты ў пятыя класы гімназій — цяпер туды павінны набіраць рабят па прапісцы. За адмену іспытаў даўно выступала Міністэрства адукацыі — у прыватнасці, гаварылася пра тое, што ўсе школы маюць права на таленавітых вучняў. Таксама абяцалі ў кожнай школе арганізаваць і магчымасць вывучэння прадметаў на "гімназічным узроўні".
