МІНСК, 26 кра — Sputnik. Прэзідэнт Беларусі Аляксандр Лукашэнка наведае пацярпелыя ў выніку катастрофы на Чарнобыльскай атамнай станцыі раёны краіны.
"У нас сёння традыцыйна сумны дзень — 32-я гадавіна катастрофы на Чарнобыльскай атамнай станцыі. Я сёння адлятаю, як звычайна, на поўдзень краіны ў раёны, пацярпелыя ў выніку катастрофы. Перш за ўсё хачу паглядзець, як ідзе пасяўная кампанія і як выконваюцца мае даручэнні па дадатковым уключэнні ў абарот сельскагаспадарчых зямель", — сказаў кіраўнік дзяржавы.
Трыццаць два гады таму
Сёння ўвесь свет успамінае катастрофу на Чарнобыльскай атамнай станцыі. У 1986 годзе ў красавіку ва ўкраінскім Чарнобылі ў атмасферу было выкінута 190 тон радыеактыўных рэчываў, сумарны выкід радыеактыўных матэрыялаў склаў 50 мільёнаў кюры, што раўназначна наступствам выбухаў 500 атамных бомбаў.
Жыхары бліжэйшых населеных пунктаў не адразу даведаліся пра аварыю. Высокія дозы радыяцыі сталі прычынай трыццаці смерцяў на працягу трох месяцаў пасля катастрофы. СААЗ мяркуе, што ахвярамі радыяцыі сталі да 4 тысяч чалавек.
Акрамя таго, чарнобыльская катастрофа магла стаць прычынай павелічэння колькасці выпадкаў узнікнення ў беларусаў злаякасных пухлін.
Прэзідэнт настойвае — вы робіце чыстую прадукцыю
У маі 2017 года прэзідэнт Беларусі Аляксандр Лукашэнка ў ходзе рабочай паездкі наведаў Палескі дзяржаўны радыяцыйна-экалагічны запаведнік у Хойніцкім раёне. Ён выслухаў даклады кіраўнікоў вобласці і Хойніцкага раёна аб радыелагічнай абстаноўцы на пацярпелых тэрыторыях і загадаў пакласці канец запалохванню людзей.
"Прадукцыю вы робіце тут чыстую. Нам трэба яшчэ раз заняцца гэтай праблемай і з улікам 30 гадоў гэтых прыняць рашэнне па гэтых тэрыторыях", — сказаў тады Лукашэнка.
У прыватнасці, была разгледжана прапанова выкарыстоўваць раку, якая праходзіць па тэрыторыі запаведніка на працягу 80 кіламетраў, для прамысловага рыбалоўства з перспектывай далейшай перапрацоўкі рыбнай прадукцыі. Лукашэнка тады адзначыў, што Беларусь здолела справіцца з наступствамі аварыі на Чарнобыльскай атамнай электрастанцыі, нягледзячы на самыя негатыўныя прагнозы экспертаў.
