МІНСК, 27 кра — Sputnik. Праект зменаў у закон аб СМІ зараз праходзіць этап дэталёвай прапрацоўкі, паведаміў у пятніцу журналістам намеснік міністра інфармацыі Беларусі Павел Лёгкі.
Беларускія парламентарыі на мінулым тыдні прынялі ў першым чытанні законапраект аб зменах закона "Аб СМІ" і шэрагу іншых нарматыўна-прававых актаў у частцы журналісцкай дзейнасці. Цяпер праекты рыхтуюць да другога чытання.
Як распавёў у пятніцу Лёгкі, праект праходзіць этап дэталёвай апрацоўкі ўсіх прапаноў, якія паступаюць. Намеснік міністра не выключыў, што да другога чытання законапраект можа некалькі змяніцца.
"Ёсць пэўныя заўвагі з боку дзяржаўных арганізацый, з боку дзяржаўных СМІ, таму што закон цікавіць усіх абсалютна, я маю на ўвазе нашу інфармацыйную галіну" — прызнаў Лёгкі і дадаў, што праца над законапраектам — "не кулуарная".
Сярод галоўных прапанаваных новаўвядзенняў — неабходнасць інтэрнэт-рэсурсаў ідэнтыфікаваць каментатараў на сайце, патрабаванне да тэлеканалаў давесці долю нацыянальнага кантэнту да 30%, магчымасць рэгістраваць інтэрнэт-парталы як СМІ і шэраг іншых.
Свае прапановы па праекце вылучалі прафесійныя журналісцкія саюзы і асацыяцыі, рэдакцыі СМІ і грамадзяне. Калі пройдзе другое чытанне законапраекта, пакуль не вызначана.
