МІНСК, 3 мая — Sputnik. Усяго за адзін дзень працы "палявой пошты" Sputnik Беларусь, якая дазваляе бясплатна адправіць віншаванні ў любую кропку свету, да адрасатаў амаль з дзесятка краін разляцеліся каля 100 паштовак.
У першы дзень працы "палявой пошты" людзі адправілі каля сотні паштовак. Большая частка з іх пайшла ў Расію, і геаграфія адпраўленняў у гэтай краіне вельмі шырокая — ад Санкт-Пецярбурга да Далёкага Усходу. Акрамя таго, людзі з Мінска накіравалі стылізаваныя "трыкутнікі" у Грузію, Украіну, ЗША, Нідэрланды, Польшчу, Германію і Грэцыю.
Своеасаблівая "палявая пошта" разгарнулася ў Музеі Вялікай Айчыннай вайны і будзе працаваць на працягу тыдня — з 2 па 9 мая. Любы наведвальнік музея можа напісаць некалькі слоў да Дня Перамогі на стылізаванай паштоўцы, якую Sputnik бясплатна даставіць у любую краіну.
Акрамя таго, 9 мая бясплатна адправіць паштоўку можна будзе падчас акцыі "Бессмяротны полк", якая пройдзе ў ТРЦ Galleria Minsk, дзе напярэдадні адкрылася выстава здымкаў карэспандэнтаў Савінфармбюро "Вайна. Без каментароў".
